Vísnahornið

Þegar Hrútavinir hittast er stutt í vísur Í hátíðarkaffinu í gær í Lista- og menningaverstöðinni Hólmaröst eftir afmælistónleikana í Stokkseyrarkirkju vegna 120 ára afmælis kirkjunnar sátu nokkrir Hrútavinir til borð við meðlimi í Öldungaráðinu á Stokkseyri. Við slíka uppstillingu er oftast stutt í vísur sérstaklega ef á vettvangi eru Tómas Karlsson og Grétar Zóphaníasson en svo var einmitt í gær. Svo mælti Grétar Zóphaníasson í gær: “Þessar eru ættaðar af norðausturlandi, úr Skeggjastaðhreppi. Á ónafngreindum bæ í sveitinni bjuggu skelegg hjón og orðhvöss. Einhverju sinni þurfti kerling að vanda um fyrir karli sínum og sló þá fram þessari stöku.

Bændur svína brúka sið
belgja víni sinn í kvið
skynsemd tína og skerða frið
skæla trýnið út á hlið.


Ekki vildi karl láta málið á sig halla og svaraði snarlega.


Ketil velgja konurnar
kaffið svelgja forhertar
ófrið helga allstaðar
af því fjölga skuldirnar.


( höfundar óþekktir)”

Grétar Zóphaníasson.