Vísnahornið

Ljóð úr Syrpu: Ljóðið hér að neðan er eftir Svan Karlsson en Svanur er fæddur í Hafsteini á Stokkseyri þann 2. ágúst 1922 og faðir hans Karl Magnússon formaður sem var sonur Magnúsar Teitssonar hagyrðings á Stokkseyri .

Gjöfin

Þótt færi ég borga á milli um heimsins höf
og hefði vökult auga í barmi mér,
það torvelt yrði að velja væna gjöf
sem verðug gæti talist handa þér.

Hún á að spegla unað þann og ást
sem í mér skín og blómstrar hverja stund
og ljóma af þeirri gleði er gafstu mér
og gerir tilveruna ástafund.

Ég ber þér hvorki gimsteina né gler
né goðum líka perlu úr söltum mar
en horfirðu´ elskan mín í augu mér
ég er að vona að gjöfin sjáist þar.