Vísnahornið

Grétar Zópaníasson, síðasti bæjarstjóri á Stokkseyri í Stokkseyrarhreppi hinum forna, hefur skilað af sér fleiri vísum eftir Magnús Teitsson hagyrðing á Stokkseyri. Tilurð vísunnar er sú, að sagt er, að Magnús Teitson var á ferð í Vesturbúðinni á Eyrarbakka sennilega um 1890. Þar voru fyrir nokkrir ungir spjátrungar og gerðu þeir gys að karli sem klæddur var íslenskum vaðmálsfatnaði og sauðskinnsskóm. Mælti þá Magnús fram brag þennan. Ekki segir meira af háðsyrðum unglinganna eftir það.

Íslenskt er skapað í mér blóð
íslenskum kom ég frá
íslenskan brúka mun ég móð
mér þegar liggur á.
Íslenskan þykir öllum góð
íslenskir hrósið fá
eins er það víst að íslensk þjóð
ílengist guði hjá.